តំណាងប្រជាពលរដ្ឋមានទំនាស់ដីធ្លីជាមួយក្រុមហ៊ុនចិន នៅឃុំត្រពាំងព្រីង ស្រុកតំបែរ ខេត្តត្បូងឃ្មុំ មួយរូប បារម្ភពីការចាប់ខ្លួន និងបារម្ភពីសុវត្ថិភាពផ្ទាល់ខ្លួន។ ក្តីបារម្ភនេះ បន្ទាប់ពីមានដីកាកោះហៅពីតុលាការឱ្យចូលខ្លួនបំភ្លឺជុំវិញពាក្យបណ្ដឹងរបស់ក្រុមហ៊ុនចិន ថា បានរំលោភកម្មសិទ្ធិក្រុមហ៊ុន និងបន្ទាប់ពីអាជ្ញាធរមូលដ្ឋានប្រាប់ឱ្យតំណាងពលរដ្ឋរូបនោះដកពាក្យបណ្ដឹងដែលប្ដឹងក្រុមហ៊ុនកន្លងមក ព្រមទាំងដកខ្លួនចេញពីសហគមន៍ទៀតផង។
តំណាងសហគមន៍នៅឃុំត្រពាំងព្រីង យល់ថា ប្រសិនបើខ្លួនព្រមដកពាក្យបណ្ដឹងដែលបានប្ដឹងក្រុមហ៊ុនរឿងរំលោភយកដីសហគមន៍កាលពីពេលកន្លងទៅនោះ ប្រហែលជាមិនមានដីកាកោះហៅខ្លួនដូច្នេះឡើយ។ ជាមួយគ្នានេះ តំណាងសហគមន៍ស្នើឱ្យតុលាការ និងអាជ្ញាធរពាក់ព័ន្ធជួយរកយុត្តិធម៌ជុំវិញបញ្ហាដីធ្លីជាមួយក្រុមហ៊ុនចិន ឈ្មោះ ហាមីនីវេន អ៊ីនវេសមេន (Hamenivent Investment) ដែលបានរំលោភយកដីសហគមន៍របស់ពួកគាត់ ហើយថែមទាំងប្ដឹងតំណាងអ្នកភូមិថែមទៀត។
0 comments: