រោងចក្រផលិតស្ករស​នៅកម្ពុជា​តម្លៃ​ជាង​៣៦០លានដុល្លារ​ត្រូវបានដាក់សម្ពោធឲ្យ​ដំណើរ​ការ​

រោងចក្រផលិតស្ករសតម្លៃជាង៣៦០លានដុល្លារអាមេរិកដែលជាការវិនិយោគរបស់ក្រុមហ៊ុនចិនត្រូវបានដាក់សម្ពោធឲ្យដំណើរការនៅព្រឹកថ្ងៃអង្គារនេះ ក្រោមអធិបតីភាពរបស់លោកនាយករដ្ឋមន្រ្តី ហ៊ុន សែន។

រោងចក្រផលិតស្ករស កៀបទឹកអំពៅ ស្ថិតក្នុងភូមិ ពោធិទាប ឃុំ ម្លូព្រៃ១ ស្រុក ឆែប ខេត្រព្រះវិហារ នៅលើដីសម្បទានសេដ្ឋកិច្ចជាង២០០ហិកតា។

លោកនាយករដ្ឋមន្រ្តីបានសរសេរនៅលើហ្វេសប៊ុករបស់លោកថារោងចក្រនេះជារោងចក្រធំជាងគេនៅអាស៊ីរបស់ក្រុមហ៊ុនRui Feng Cambodia International Co.,Ltd. លើគម្រោងទឹកប្រាក់ជាង១ពាន់លានដុល្លារ ដែលនៅជំហានទី១គឺចំណាយជាង៣៦០លានដុល្លារហើយត្រូវការពលកម្ម៧០០០នាក់។ លោកបន្តថារោងចក្រនេះនឹងផ្តល់ការងារដល់ប្រជាពលរដ្ឋជាង១៤០០០នាក់នៅពេលគម្រោងវិនិយោគត្រូវបានសាងសង់ចប់សព្វគ្រប់ ។